الظاهر انا مجنون بشخابيطي.
بس هم تحمّلوني....
(مجنون فلانه ... )
يكولون قيس بليلى
وجميل ببثينة مجنون
ثاري مو بس ابن الملوّح وابن معمّر
اني هم بالحب سموني مجنون
شلون ما اجن؟
وهي اللي صابتني بنظراتها
بسهم سحر العيون
مو هيج أهل الشعر يكولون ؟
وتريدون ما أجن؟
شلون ما اجن؟
اذا بمشيتها كل الهيبة
ومن صوت خلخالها اهل الموسيقى
اوتارهم يدوزنون
شلون ما اجن ؟
واني الّي من عشكها ومن عطر أنفاسها
من خلقت مسكون
شلون ما أجن؟
إذا كل بنات آدم من غضاضتها يغارون
وإذا كل اللي يشوفوها ويشوفون حسنها
بالشماعية يصفون
بس اني فاتنتي مو (بثينة) ولا (ليلى)
فاتنتي.... (فلانة ...)
و(فلانة... ) بفتنتها كل البشر يحجون
وتردوني ما اجن ؟
شلون ما أجن و(فلانة...) إذا
نامت
غابت الشمس وياها وتنطفي كل النجوم
وبغيبتها يختفي كل طعم ويزول كل لون
وإذا صْحَتْ
مو بس الشمس تصحى
حتى الكُمر والنجوم .
وبصبحها يصحى كل الكون
وتريدوني ما اجن؟
شلون ما أجن ؟
إذا اني مو بس بأحلامي ويا (فلانه...)
اني حتى بشخابيطي اصبحت مجنون .
Astefan Odisho
ليست هناك تعليقات:
إرسال تعليق